Excerpt for على باب الله by , available in its entirety at Smashwords

ناس تعشق سيرتها

وناس تعشق سيرتها

وناس فيك للرحيل

أول ما تجيب سيرتها

ب تلاقى الكون تقيل

باهت كاره ملامحو

وتسمعلو كتير عويل

وتناجي يارب سهل

فوت يومنا الطويل

مش ناقصه القعده غمو

ويحتار فيك الدليل

تكتم جواك مشاعرك

وتقول فين السبيل

ويارب رياح مُثيره

وكمان يصحبها سيل

أو أى حد ينده

ينجدنا من الرذيل

ان شا الله تكون خناقه

أو قبضة عزرائيل

وناس بتهل فيك

أول ما تقول ياليل

تبدء ريحة عُطورها

ويبدأ طرح النخيل

وتلاقى الكُون أميرة

وخيلك عاشقه الصهيل

وتلف الكون تسافر

ترجع عطشان ل نيل

تلقاه مداد دراعو

والحُضن كأنو ميل

تدخل تلبد في حُضنو

وتدندن اه ياليل

والليل مايجيبش أخر

ولايعرف مُستحيل

ونسان شبعان حكاوى

وب تفتح فيك سبيل

تشرب وتبل ريقك

تملا وتدى الزميل

وأهلاً والله أهلاً

طول كمان ياليل

وحشانا اللمه جداً

ويارب مافيش رحيل

احنا والحكومه والكهف

وربي يخيليكو لينا

نُشكُر ونبوس إيدينا

جمايلكوا مغرقانا

وافضالكو كتير علينا

ب تقتلوا ف عيالنا

وب تخرقو ا السفينه

اما الجدار ف طنش

وخدوا الكنز اللى لينا

وأبونا ماكانش صالح

مازرعش الحق فينا

علمنا نوطي دايماً

نُشكُر ونبوس ايدينا

وعلم الحُكومه واسع

هيا الخضر اللى فينا

وأكيد في سر كامن

في قتلكُم عالينا

وف خرقكو السفينه

وفين احنا ؟ وفين عقولكُم ؟

وانتوا البركه اللى لينا

فاهمين وف كُل حاجه

أما السكُوت ف ..لينا

ومسموح بس ان ندعى

ربى يخليكو لينا

جمايلكوا مغرقانا

وافضالكوا كتير علينا

ونبي الله ياموسي

وانتوا الخضر اللى فينا

كفر عسكر

ويا حبيبتي يا كفر عسكر

ويا أُم المعجزات

عُمدتها كان اسمو عسكر

والخلفه سبع بنات

ومين يُحكُم بلدنا

لو يوم العُمدا مات

ولا بُد ولد ياعُمدا

ودعينا يارب هات

وخلاص حبلت ياعُمدا

وخليفتك فينا أت

وربك سهل ياعُمدا

والكفر ف فرحه بات

وح اسمى الو يلد عسكر

ورقصنا وبالصاجات

ومليون مبروك ياعُمدا

وعقبال فرح البنات

وكبرنا وجات عيالنا

واتغيرت حاجات

واهو زيو زي غيرو

العُمدا بتاعنا مات

ومن بعدو ورثنا عسكر

زينة اخواتو البنات

واتجوز جاب عساكر

تورث بعد الممات

وعيالو ف كُل حته

ونهابين كُل الحارات

والكفر بقت بلدهم

واحنا علينا السُكات

نسهر بالليل نكركر

ونعد الانجازات

والصُبح نقوم نطرطر

ونسيب في الغازات

نفطر مما ما تيسر

أو فاض في الزبالات

ويا حبيبتي يا كفر عسكر

ويا أُم المعجزات

وبقيتى خلاص مُعسكر

عايشين فيه من سُكات

نخدم في بيت سي عسكر

زينة اخواتو البنات

صالة الوصول

وانا اللى عشقي رباني

وماليش فيكي غرض تانى

شيطانى عُمرو ما غواني

ومنانى بغرض تانى

وجايلك فاتح احضاني

معطر فيا انساني

وناسي كل احزاني

وجامع كُل خلاني

وناس ركبت كتير تانى

واعدى ف بحر والتاني

واشاور ل اللي عداني

مايرجعش خلاص تانى

وينسانى

لان خلاص مافيش تانى

هروب منك يا وحشاني

ياخبزاني وعجناني

ووهباني الحنين تانى

يمين بالله ما انا مسافر

ولاسايبك في يوم تانى

وفجأه بجز في سنانى

وسيرة أهلي في وداني

وأقول خلص يعيد تانى

وسمعني وأشجاني

وماسك سلسفيل أهلى

لغاية مينا وداني

وافتش فيا واهمسلى

أكيد روحنا بلد تانى

ويهمسلي اللى جنبيا

وماسك في ايدو كام ميه

ماتيجى ف صفنا التانى

وتدخُل دخله سُلطاني

واقولو لأ مُش طبعي

ف يتبسم وينساني

يخلص وف ثوانى يفوت

وموكب صح سُلطاني

ويرجع لى ونفس الصوت

ويبدء وصله من تانى

وجاي منين وايه جابك

ابوك لا ابو اللى يوم جابك

يافقري ياعرة اصحابك

قرفنا وانتا في غيابك

فما بالك تعود تانى

وشايف الصف دا كُلو

تعيدو برضو من تانى

وب اكره فيا إنساني

وب اهمسلى وجواني

أنا اللى عشقي رباني

بهيه ومليون ياسين

واللى قاتل يابهيه

كُلنا عارفينو مين

هوا عارف وانتي عارفا

وكُلنا ب نحني الجبين

ليل نهار ب يحشوا فينا

ويقتلوا ملايين ياسين

واحنا ب نحضر جُثثنا

ونتصل بالمسئولين

محتاجين ندفنها بدرى

ونسأل الله المُعين

بدرى بدرى ورقنا يخلص

قبل مواعيد الكمين

ونندعق نعمل عزانا

ونبتدى رفع الإيدين

ل السما مرفوعه تشكى

وف مرار نحنى الجبين

وييجي كم واحد يعزي

وبدرجة الميتين

كُل ميت لُه مقامو

ولُه مقاسو معزيين

ربُع في التاني وخلصنا

وهات حساب الُمقرئين

وفيهُم اللى عرف حالتنا

وابتدى يشككنا دين

ضامن السبوبه دايمه

وكُل يوم فيه ميتين

وانتي عارفه وهوا عارف

واحنا برضو مكملين

كُل يوم ناصبين فى قعده

ويندفن مليون ياسين

عنيكي والمُستحيل

وب اخاف م المستحيل

من صمتها الطويل

عنيكي تغوص في قلبي

وتقوللي هات دليل

ان انتا حقيقي عاشق

وبتسهر ليل طويل

أحبس نارى ف ضلوعى

واكتم فيا العويل

مع كُل اللي ف ملامحي

من سُهد ومن رحيل

لسا بتسأل عنيكى

ولسا بتحتاج دليل

وفيا الأدله ياما

وفوق المليون دليل

أولهُم في انهياري

لما عطورك تسيل

في نسيم صُبح الحوارى

وابدأ سفري الطويل

وبسافر الم عطرك

يمكن ينفع دليل

وأخرهُم قبل نومى

قبل الفجر بقليل

ب ابعت روحى تناجيكى

تلاقكي ف نوم طويل

وخلصتي الحلم كُلو

ولسا ماجبتيش دليل

الرضا

ومش راضى؟

اخبط دماغك

في أى عامود يقابلك

رزقك مقسوم وعُمرك

من قبل الكون وقبلك

واللى نصيبك يصيبك

وح يجى اليوم يقابلك

وتصير فيك المشيئه

زيك زي اللى قبلك

وبعدك بسنين يجيها

ويخُش التُربه قبلك

والموت لازم تدوقو

ولا بُد ف يوم يقابلك

تنفد منو ف معارك

ومُمكن في سرير يقابلك

ولو دامت يوم لغيرك

ما كانش راح وسابلك

ولا بُد تسيب لغيرك

زى اللى راح وسابلك

العمده حامل

واتفرج ياسلام

واتمتع ياسلام

في بلدنا اُم العجايب

بلد الناس التمام

العُمدا بدل هريدى

بقا اسمو مدام سهام

ونحل ف أي مُشكل

لازم رأي المدام

وشيخ البلد يدقق

ويديها التمام

وما نابنا من الحضاره

غير تلقيح الكلام

والليله خميس يا عُمدا

ويارب تفوت تمام

وقريب تبقا حامل

ويبطلوا الكلام

اتسخط العُمدا راجل ؟

مابقاش خلاص مدام ؟

ويا كايداهُم ياعُمدا

ومسكتا الكلام

والعُمدا بتاعنا حامل

واتفرج ياسلام

في بلدنا ام العجايب

بلد الناس التمام

على بعضها

وعلى بعضها

بمرارها كُلو

وغُلبها وبسحرها

حتى افتراق العاشقين

على شطها

ساعة انكسارك

وانت كاره امُها

ساعه حنينك

وانتا حاضن همها

ومُشتاق لها

وأول سفاره تخُشها

ترمى الجواز وتفُضها

سيرة غرام

ما بيكتملش ف برها

واول ماتُصرُخ

تجرى جري تضمها

تسندها تمسح في التُراب

من كُمها

وتكون لها

كوباية الميه

اللى راويه ف حلقها

وتعمل قميصك مروحه

وتجيب لها حبة هوا

وتبُص في عنيك الحزينه

وتبتسم تشتاق لها

يُحرس طريقك

تتستر وتدوم لها

وشكراً ياحاجه

دا شئ بسيط

تهمس لها

ومع السلامه

خلاص نويت على أُمها

ولا اهتديت وخلاص

بدأت تصُمها

وحفظتها

هيا كدا وعلى بعضها

هُما وبس ولادك

كُل الايام علينا

ولا مره ؟ تدور عليهُم

واخدين السعد كُلو

واحنا النحس اللى فيهُم

كُلك براح عشانهُم

وكأنك بس ليهُم

والباقى يروح في داهيه

وبرجلك تفعصيهُم

هُما وبس اللى طرحك

أما احنا؟ ف لقيتيهُم

خدتي الصواب تربى

واهو بُكرا صرنا ليهُم

حبه عبيد ولايا

خيرك ونبوس ايديهُم

ولا مره ف يوم صرختي

ولا حتى شاورتي ليهُم

خفوا العذاب شوية

وانتى اللى بتبعتيهُم

بعد نصاص الليالي

وب تُقفي تشاورى ليهُم

عن فين مكان عيالنا

وفى الصبح بتسجنيهُم

وحاضره التحقيق معاهُم

وانتي اللى تفهميهُم

الواد دا مخبي حاجه

وضوافرو بتقلعيهُم

وبتلبسي ف وشاحك

وتكوني الحُكم فيهم

ونرجع ننقُض تعارضي

ولا بُد الحُكم فيهُم

وقوام عشماوي كُنتي

وجالك قلب تشوفيهُم

جوا داوير المشانق

وانتى اللى تنزليهُم

ب أيديكى وخُد عيالك

ولا كانك تعرفيهُم

وسبقتي على المدافن

وبدأتي تعدى فيهم

مظبوط صحيح عددهُم

وتشاورى وتحسبيهم

ونقول عرفت غلطها

ويمكن ح تكرميهُم

اتاريكي في عز عدلك

وعايزه الضريبه فيهُم

وخايفه لا ندفن ونهرب

ولا ندى ضريبه ليهُم

صحيح فعلاً عيالك

اما احنا ف لقيتيهُم

قلبي ورحلة هواكي

قلبي ورحلة هواكي

وكتير كتير ورق

ب تغيبي اشتاق إليكي

وافرد فيا الورق

وابدء سفرى ف مداين

مرسومه على الورق

فايح عطر الجناين

وبخورها ب يتحرق

وارسم واكتب قصايد

واملا سطور الورق

ومابين عطر و كتابه

دايب همس الورق

قادت جواه نيرانو

وم العشق ب يتحرق

واكتب اسمك يندي

ويهدا حريق الورق

وتهلي انده عنيكى

وابدء رص الورق

افتح كُل المداين

وافرش فيها الورق

ويفوح عطر الجناين

وبخوري ب يتحرق

ويادوب باديه القصايد

تترك سطر الورق

تسكُن في بحور عنيك

يبدء فيا الغرق

سافرت خلاص عنيكى

وسابتنى مع الورق

ومابينى وبين عنيكي

اميال اميال ورق

وادخُل وانصُب مشانقى

ويطويني كتير ورق

جورنالجي واطي

جورنالجي واطي

وتعرفو ب نظرة عينيه

كلب ابن كلب

وبالجزم يداس عليه

وان سيدو قالو

مافيش إله أمن عليه


Purchase this book or download sample versions for your ebook reader.
(Pages 1-24 show above.)