Excerpt for دم الحُسين by , available in its entirety at Smashwords






صدت فيك الحكاوي

صدت فيك الحكاوي

تاهت بيك الدروب

دبلت ريحة القصايد

فاضل نزف القلوب

لساك ع الوصل ناوي

ولا خلاص الغروب

ب يدُق الباب ح تفتح

ولا نويت الهروب

تنحت فجرك لوحدك

وتدوب في الضي دوب

تستنى الطاقه تفتح

وتهم تقول يادوب

فاضل ع الصُبح ساعه

استغفِر فيها اتوب

وارجع بعديها اكمل

سفري ف صمت الدروب

مستني تجيب أخرها

مستني تجيب أخرها

وتتطربق ع الجميع

مسؤول الكُل عنها

حتى الطفل الرضيع

اُمه تُراثها الأغاني

ودا سجع ودا بديع

وحروبها فى القصايد

ووطن مُش ل الجميع

ينحت يبنى ف خرايب

وزرايب ل القطيع

وتقوللي تعالى نحلم

نحلم ونشوف ربيع

وربيع حواديتو خِلصِت

مابقاش عاشق البديع

ومستنى تجيب أخرها

وتتطربق ع الجميع

يمكن ح اغفر ساعتها

أو ح استثنى الرضيع


استراحه

مابقاش فيه حد عايزك

ولا حد ب يشتهيك

غير صمتك فيك وحُزنك

أو دهشه ب تحتويك

لما الشبابيك ب تقفل

فى عيون كُنت الشريك

ف براح دُنيتها ياما

واهي ردت فيك عليك

مُص ف صبار سرابك

حاول تغرز إيديك

جواك وتشد قلبك

وانزع جمد إيديك

حتى الكراكيب ب ترحل

وتفضي مكانها فيك

وازن لو كُنت تقدر

بعبش شوفلك شريك

مالقيتش ؟

تسد بابك

وتقول ح اخُد بريك

خُلصت كُل الحكاوي

والباقي نزيفها فيك

كابد

كابد وحدك وسافر

وحدك برا القطيع

جاهد وابدُر غيطانك

ح يهل ف يوم ربيع

مهما تدور الدواير

سدك عالي ومنيع

توبك حلم الغلابه

مُش زينه ومُش ل بيع

قمحك ب يزين ملامحك

واجمل من مية ربيع

أشجع من ألف فارس

لكن في الشوق مُطيع

تنده كُلك يلبي

وتصير طفل و وديع

فاتح للكُل بابك

وب تنقُش كون بديع

همو بيوت الغلابه

عشقو دخول الربيع

ونخيلك لسا طارح

وغرامك مُش ل بيع

مسيرها تهون

واهو من دا على ادا

مسيرها تهون

وساعات ب تغيب

وساعات ب تؤن

مرات نرتاح

وكتير في شجون

وب نهتف ندعي

لرب الكون

وساعات بهوات

وساعات ب نكون

لابسين جلاليب ونربي دقون

ماهو حق الموس مابقاش مضمون

وساعات يفرجها إله الكون

ونربى كروش ونزيد في دهون

وكمان نفترى نشتري معجون

ماهو اصل سنانا تعوز الصون

وشراب للجزمة وصبغة لون

اهو نروي الجزمه نجدد لون

يمكن نحتاجها تكون في العون

مشوار للمركز أي شؤن

واهو من دا على ادا

مسيرها تهون

ومسيرها ح تفرج

أوي وتكون

نفحات من عندو وتملا الكون

فدادين م الرُز وزيت وصابون

نتعشى ونغسل بالمعجون

وكمان الصُبح الحُما مضمون

واهو من دا على ادا

مسيرها تهون

عِطرِك

واسافر والدليل عطرك

وقلبي لسا قد الريح

وعاشق مهما ب يكابد

وعاشق مهما عاد لى جريح

وتتساوي الدروب عندو

نسايم ولا كانت ريح

دليلو في الدروب عطرك

وشوقو بالأماني يصيح

تهلي يبتدي فجرو

وروحو تبتدي التسبيح

عطورك تسري ف جروحي

وتمحي من دروبي الريح

عَطش

قتلك عطش السواقي

هلكك يبس الضروع

ومهما تبين خُضوعك

عمرك ما تسد جوع

حلمك ي تسد جوعك

حلمو تزيد الخُضوع

ترجع كلاف في أرضو

ويرجع سيد الربوع

وتفضل فاتح لصدرك

ممنوع تلبس دروع

ممنوع ترفع راياتك

أو تنده للجموع

و يزيد عطش السواقي

يفضل يبس الضُروع

وانتا اللى بتروي حلمو

وتزيد فيك الخُضوع

حلك تلبس دروعك

وتنادي على الجموع


بساطه

وبسيط الحلم جداً

لُقمه وب تسِد جوع

هدمه وبتلم بدنك

منديل ل اجل الدموع

مُش مستاهله التنازُل

ولا مستاهله الخُضوع

حاول ترحم مشاعرك

حاول ليك الرجوع

قاتل جرح الكرامه

لكن هين ياجوع

مره وتحنيها راسك

تتعود ع الركوع

مهما ب تكبس في بطنك

لسا بتصرخ ياجوع

وتحاول تحي هامه

بعد سنين الخُضوع

مهما تحاول تقيمها

عشقت ومافيش رجوع

هوا استخدامها واحد

للهز وللركوع

ريحة الجنوب

قلبى يحب المداين

لكن عشقي الدروب

وبيوت بالطين وناسها

صابرا وصافيه القلوب

والتوب على قد حالو

ومُش لازم فيه جيوب

كافتيريا في كُل حته

وتدُق الباب يادوب

تاكُل تشرب تعسل

ودُعاهُم م القُلوب

ومُش محسوبه النوبادي

دايماً طبعك هروب

واستنى دقيقه واحده

خُد دى وفصلها توب

وافتح حجرك وخُدلك

حبة تمر ويادوب

تتسلى وانتا ماشي

وتتدي عيال الدروب

ولازم نتعشى بُكرا

شرف بعد الغُروب

وبلاش تركب دماغك

وتقول وقتك يادوب

وطلاق طلاقين تلاته

خلصت ومافيش هروب


اتجاه واحد

وسع بقا الحُفره

و مجد كدا الواحد

ادى كمان ذكرى

وزا العدد واحد

خايب وب تصدق

إن انتو شئ واحد

واديه بقى ذكرى

وما صانش يوم واحد

وبلاش بقا تصدق

في الدُنيا غير واحد

هوا أكيد انتا

بعديها ولا واحد

وان حد جا جنبك

قولو المكان واحد

وابدء بقا الرحله

واحجز مكان واحد

وخلي تذكرتك

تبقى اتجاه واحد

تخاريف سفر

واسافر فيا

واسألني

ح تنزل فين؟

وارُد عليا

أجاوبني

بتسأل مين ؟

دا نام من بدرى

واتغطى

بقالو سنين

وبطل من زمان

يسأل

ح ننزل فين ؟

وكُل طموحو

ف الرحله يعدي سنين

ومش فارقه

المعاد نوصل

ولاتفرق ح ننزل فين

دُعانا بس تتسهل

ونوصل

مش مُهم لفين

أبو عُدي

ومين فيهُم يقول لأااا

ومين منهُم ما باسش الإيد

ومين للموت قدر يضحك

ويستشهد صباح العيد

لمين المعزا في بلادى

ل ابو عُدى اللى فاتها شهيد

ما واطاش الجبين ابداً

ولا اتحايل وباس الأيد

وقابل بالرضا ربو

وفاتهُم ع الكراسي عبيد

ب يرجف كُل مافيهم

يطول في السجود ل السيد

ومشانق بُكرا تتعلق

ولكن يصعدوها عبيد

صعدها وهوا ب يرتل

ورايح ل اللي خلقو شهيد

وفاتهُم فوق كراسيهُم

ولكن في النهايه عبيد

ب يرجف كُل مافيهُم

يطول في السجود ل السيد

طير مغرد

وانا طير مُغرد

في جنان الشوق

والعشق غالب

بس ساجنو الطوق

حاضره الأغانى

ومشتهيه تفوق

تعزف ناياتك

تنتعش وتروق

ف ابدأ حصادك

وادي قلبى يدوق

ليلك مطول

ولا ناوي شروق ؟

عليت قصورك

يا اللى ساكن فوق

وانا لسا ساكن

فيا قصر الشوق

مستني تُحصُد

تدي قلي يدوق

وتفُك أسري

تحل مني الطوق

تطرح جنايني

والتقيني فوق

ساكن شبابيك

صادح في كُل شروق

عم أنيس

خُد بالك منو ياعم أنيس

مش كُل رقيق الهمس حسيس

ولا كُل ناضورجي تشوفو بوليس

تجري وتدارى ف جوز نسانيس

تتناسي الشيبه وتصبح سيس

و بدال الحلم تشوف كوابيس

وبلاش تستعجل يا اسطى أنيس

تعملو مقام وبديت تأسيس

جمعيه طيب أوي وحسيس

سيبك من هريو وم التدليس

دي حاجات محفوظه وبالتدريس

يتدرب فيها ويبقى عويص

ويمُص ف دمك وانتا التيس

ب تغني وتكتب فيه كراريس

وتشوف الطشت تقول دا هويس

واداك الحلم لقيت كوابيس

وسامحني بشده ياعم أنيس

فكرتك خبرا لقيتك سيس

ف اسمح واتلطف وابقا حسيس

كلمنا شويه عن الجواميس

واهي حاجه ب تفهم فيها ياسيس


مُناجاه

قلبي اللى سجد لك

وانتا رجاه

ومزاجها الدنيا

العِند معاه

ب تشيلو الريح

ويحطو هواه

والصبح يفوق

بالليل تلقاه

مش قادر حتى

يقول الآه

طمعان وبكرمك

تتولاه

وتدلو لبر ويتلقاه

وتزيد ف شمولك

تتغشاه

بنسايم رحمه

تقويِ رضاه

وتطِيب كدا

نفسو لقدر الله

يتحمل مُر مرار الآه

ولا غيرك ابداً

عندو رجاه

من صُنعك

وانتا عليم بدواه

ياعليم بالقلب

وب اللي حواه

تُجبُرنى وتُجبُر فيا الآه

وتندى القلب

تزيد فى رضاه

وانا عبد فى مُلكك

وانتا إله

والعبد ما يسأل

غير مولاه

وسألتك كُل

اللي اترجاه

تختمها بخير

وسلام وصلاه

على سيدنا وسيد

مخاليق الله

ضنينه

وضنينه ياعم الدُنيا بناس

تغواها تشيلها وفوق الراس

وتطاطي تخلى الخد مداس

مش ذُل ولكن فيه احساس

من إنو دا صنف وغير الناس

موجود ولكنو قليل كالماس

وكأنك واخد الدوري وكاس

وتشوفوا تحس بإن الناس

لساها بتعرف قيمة الناس

وتقول دى كنوز معرفة الناس

وتمن علينا يارب ب ناس

من نفس فصيلة نفس الناس

نتسند بيهُم على الايام

من بعد ماعدا العُمر خلاص

وماب قتش الدُنيا ب تنتج ناس

غير شئ مخلوق

معموللو مقاس

يتعامل مره وبس خلاص

وكأنو دخيل على دُنيا الناس

فُكك مني ياعم عويس

ما تفُكك مني ياعم عويس

وتسيبني ف حالي وقول خلاويص

أنا مالي ومال اُم الدستور

وحيا الله انا واحد م البلاليص

دا ف بالهُم يعنى ياعم عويس

ونرجع مرجوعنا عن البلاليص

قصدي الدستور

مالو الدستور

نورني وفيدني ياعم عويس

وادينى قعدت اهه خلاويص

حجرين والشاي والقعده تهيص

وبعديها احلب لك جوز جواميس

بس افهم منك وابقى حسيس

مش كُل حياتي عراك وبوليس

واتفضل يلا ياعم عويس

نورني وقيد فيا الفوانيس

أيه الدستور ؟

امبارح كُنت ف قعدة كيف

وسمعت قناة الأخ لميس

جايب كدا باشا معاه كم تيس

باشا ومتهندم قوي لبيس

متنقى كلامو من القواميس

قاعد متسلطن كنو عريس

ودماغو تقول مافيهاش ترابيس

انا قلت دا حاوى وفك الكيس

وكلامو كأن فتحت هويس


Purchase this book or download sample versions for your ebook reader.
(Pages 1-19 show above.)