Excerpt for ميدان الأماني by , available in its entirety at Smashwords


باطل وحق

كتير ب يبقى باطل

ونقول عليه دا حق

وب نحلف إنو باطل

لكن مانقولش لأ

ونخاف كتير ل يزعل

اللى ب نقوللو لأ

يضايق منا جدا

ويجيب علينا حق

ونلف ندور وجداً

عشان نقوللو لأ

مع إن الحق واضح

أما الباطل ف لأ

لكن فيه ناس تشوفو

وناس ماتشوفش حق

وناس تعشق باطلها

وفى الحلم يكون بطلها

وناس ومهما طالها

تقوم وتذوقو ذق

وتقوللو لسا باطل

و ح تفضل برضو باطل

وعمرك ما ح تبقى حق

قلبي ماصدقنيش

قلبي ما صدقنيش

ولا خد ب أعذاري

وقالي ليه ه نعيش؟

في الصمت وندارى

افتح بيبان الشوق

خلى الغنا ساري

ولملم الاحباب

سهرلى أوتاري

ياقلبي صدقتك

وياريت ما صدقتك

رجعت تانى وحيد

ونيسي أوتاري

قلبي ما صدقنيش

وفتح بيبان الروح

لعب الهوا بيا

وبروح له فين ما يروح

وارجع لياليا

تملاني شوق وجروح

لا صمتي ريحنى

ولا دوانى البوح

قلبى ماصدقنيش

وعلا الغنا فيا

هيئت أفراحي

وضويت لياليا

انقش حروف اسمك

قمره ملاليه

وف عز عز الشوق

خلى القمر بيا

ياجعيدي يا وِلد عمي

وياجعيدى ياولد عمى

الحقنى انا بتخنق

أُختك لبست جُونيله

واخوك علق حلق

في ودانه وهز وسطو

وضيق الخلق

وابُوك في النت بلط

وكاره الخــلق

وبيدعى في البلد دي

ياريتو ما اتخلق

وأُمك بقت مصيبه

في الضُمنه وفى الورق

ومافيش حد يجاريها

ولا عمرو ح يتخلق

وجدك للجيرل دانسنج

بينظم الفرق

وبيحدث قال بلدنا

وينقذها من الغرق

وبيقول قال دى رساله

وهو ليها اتخلق

وكمان بطل يصلى

وخلاص دقنو اتحلق

والناس عاشقاه لجدك

وبياخدو معاه فرق

ف الحقنى ياولد عمى

خلاص انا بتخنق

ياتاجى تاخدنى عندك

يا انضم انا للفرق

افرح

ويا قلبى افرح بالحياة

وسوي البدع

ولا انتا يعنى ما تشتهيش

غير الوجع؟

وانوى الرحيل بدل حياتك

ناس ب ناس وبلاد جديده

خلاص شبعنا من الخِدع

وجدد هواك

مين اللى قال الإنكسار

والصبر ع الحرمان وَرع

وافرد شراعك للهوى

مستني ايه لمان تُقع؟

على الغُنا جواك

وان شا الله عُمرو

ما كون سمع

وافتح طاقات الفرح فيك

عُمر اللى راح ماف يوم رجع

عيشها ب بساطه وكون بسيط

وبدون الآم وبدون جزع

ح تلاقى كل الكون بسيط

رغم الشراك رغم الخدع

وتلاقى كُل غصون جَوَاك

نشفت خلاص فجأه ب تُقع

وتحس فجأه بيوم جديد

فجرو انجلا واسمع ادانو بترفع

واياك تحس الإنكسار

مهما يلاقيك مهما ب تُقع

تُسكن فى حُزنك تشتهيه

وتمنى نفسك دا الورع

وصدقنى أبداً مش ورع

صباح الفول

وياصُبح مضايق

لاوى أوى ف بوزك

كأنى سبيتك

أو انى جوز أُمك

داخل شمال في الكون

زاعق ولا همك

وكأننا قاعدين

ب نجيب في سيرة أُمك

مره بقى تنضف

مايجيش معاك غمك

وشوف بلاد الناس

فيها الصباح ازاى

ب يصحو يا كلو كيك

وحاجات من اللى هاى

مش كحيانين زيك

جايبلى نص رغيف

وتقولي فين الشاي

وأن قلت لك نفطر

تعملي فيها عبيط

وتقوللي يعنى ازاى

حاول بقى تفهم

خليك صباح مسؤول

وانسي ولو مره

عشقك أوى للفول

وهات معاك حاجه

م الباقي م البهوات

ب ياكلوا بسبوسه

ويفتو كورن فليكس

شاربين حليب طازه

وغير العصير والبيبس

وحاجات كتير تانيه

ب تفتح أوى للنفس

الكدب راحه

وف بلادنا الكدب راحه

الكدب اكسير الحياه

مبتسم على طول ب يضحك

عُمر ما بتفرق معاه

وانتا فيك الصدق صارخ

منتحب وب الف آه

وكُلو ب يلومك بشده

كُلو ب يناديك ب ياه

وانتا عارف معنى ياه

بعدها ب تيجي الشتيمه

وكوم كلام تحتار معاه

عن علامك عن اُصولك

عن مجيئك ل الحياه

وليه كده منشف دماغك

وامتى ح تعيش الحياه

مُش نهاية الكون ياسيدي

مره أيوه ومره لا

مره صهين مره فوت

مره قول ل الحظ ياه

والسعيد ح تجاورو تسعد

والتعيس تسمعلو آه

صباح كالح

ياصُبح في بلادى

عايق  ومتهادي

ب بارود ملا سينا

وبدم في الدلتا

وعويل على الوادي

أعمل بقى ب أصلك

وكون صباح نادى

الناس خلاص زهقت

م الرغى ع الفاضى

واوهبنا حلم جديد

ملينا م العادى

ب يبدء طموح جدا

وينزل على الفاضى

وياصبح متهادي

أرحم بقى بلادى

وبطل فى يوم تنهب

من قوتها وتهادى

وتدى اللى ناهبها

وبرضو مش راضى

عايز كمان أ كتر

يا اما ح ينادى

ويسيب عساكرو عليك

ويسجنوا ولادى

جامعي

وف بلدنا الجامعه

حربيه وبوليس

واللي بعدو

كُلهُم توظيف مافيش

والشهاده معاك وجاهه

فك خط ونفش ريش

بلها وميتها تشرب

مُش أمان ولا أكل عيش

حاجه بس لزوم جوازك

زي سُفره وزي نيش

وبرضو يعني المُده أبسط

لما تبقى تخُش جيش

عاجبك التعليم تعالى

وان زعلت خلاص مافيش

تفرق ايه سواق ب ماستر

ولا فني ف فُرن عيش

انتي

ورغم ضيق الكون دا كُلو

ب يبقى فى عيونك وسيع

ورغم وسعو وازدحامو

فيه لوحدي ب اتوه واضيع

وبس لما ب تيجي سيرتك

يبقى كُل الكون بديع

تبتدي تفتح ورودو

ويترسم مليون ربيع



قيس وليلى

كل قيس وف قلبو ليلى

وقلبو دايب الحنين

توعدو يطرح نهارو

ويأسرو فرط الحنين

ويبتدى فيه اشتعالو

ويبتدى فيه الأنين

وف غرامو يدوب ويسهر

يملا ليل السهرانين

ب الأماني وب الغناوى

وناس كتير متجمعين

كلهم في قلبو ليلى

وليلى نامت من سنين

المجد ل الشقيانين

والمجد لكل حد

ب يمد الخطوه مد

ويقوم يفرد نهارو

ويشدو بكل جد

ويلا خلينا نزرع

خلينا نقوم نكد

شقيان وبكل عزمو

ب يهد الأرض هد

بدأت خلاص تنبت

وكتير نوار وورد

والمجد لكل حد

ماقالش الدنيا برد

وداس زرار مكنته

رص الخامات وعد

مشغول جدا في شغلو

مش فاضى لأى رد

ونادى العمال تحمل

شدوا الحزام بجد

والخيبه لأى حد

قاعد يندب ليومو

ويعد دقايقو عد

يقوم يلبس هدومو

ويمد ف بوزو مد

وياخد مصروف من اومو

ويشد الخطوه شد

ويروح ع القهوه يجرى

بكل شوق وود

كُلنا كدابين

كُلنا ب نكدب علينا

وكُلنا شيطان رجيم

اللى فاهم بس ساكت

واللى متغابي ولئيم

واللى مدروش ويصرخ

امتى تفرج يا الكريم

واللى لما خلاص ح يهتف

يهدا ويحُط الكريم

ويبقى واحد تانى خالص

فجأة جداً صار حليم

واللى لما تشوفو أهبل

بس بالأسرار عليم

كُلنا ب نكدب علينا

وكُلنا شيطان رجيم

مهما ب نحاول ندارى

ومهما بنحُط ف كريم

ذكريات الأُمنيات

والقلب

عاشق فيا

نبت الأُمنيات

وتشد عودها

شويه تصبح ذكريات

يفرد لى إيدو ويبتسم

ويقوللى هات

واهمس وأقولو منين

يئن ومن سُكات

يبدء يخاصم فيا


Purchase this book or download sample versions for your ebook reader.
(Pages 1-14 show above.)